St. Moritz vom 29. Juli bis 3. August - Tagebuch/Fotos Teil 2

Tagebuch/Fotos St. Moritz - Teil 2

Montag, 29. Juli 2013

Wo am Morge dr erscht Blick usem Fäischter gfaue isch, hei äuä zersch aui z Gfüeu gha ds Schlächt- Wätter-Programm, wo für dä Tag wär agseit gsi, tritt nid ii, doch wo nachemne nahrhafte Zmorge dr zwöit Blick id Wäutgschicht use isch gfaue, het du das erstunlecherwis scho ganz angers usgseh. So hets ufzmau gheisse: viertu ab 10ni Abfahrt mitem Bösli für uf St. Moritz Dorf.

Auso isches när grad ab zu däm Ort gange, wo äuä viu i böser Erinnerig wärde ha! Wo mir si acho uh gseh hei was uf üs zue chunnt, hei es paarne gloub scho denn d Chnöi afa schlottere. Mitemne mulmige Gfüeu hei mir auso di 192 Stägetritte betrachtet, wo mir hätte söue bewäutige. Womer dr erscht hei hinger üs gha, hei äuä aui scho gmerkt, dass mir di 8mau, wo ufem Programm si gstange, nid wärde überstah. Spetistens nachem Zämebruch vor Helen, isch das aune klar gsi. Auso isch z Programm zum Glück grad schnäu verchürzt worde uh so sis när nid emau meh d heufti vo de Tritte gsi. Aber oscho das het üs sehr viu abverlangt. Natürlech isch oh bi däm Training wider so e Schnapsidee cho. Uh zwar het Sevi zersch mau nume schüch vorgschlage grad derthie z Turmspringe i See ache. Ds het me aber mit gmischte Gfüeu agluegt. Vor auem bi däm grusige Wätter het das viune nid so passt. Auso  si när nachemne churze Usloufe ufem Sportplatz nume Sevi, d Vanessa uh ig üs gah id Töifi stürze. Während desse di angere schön ar Wermi z Zmittag gnossse hei, si mir im Trio auso öpe vo 8m gah ache gumpe (mit meh oder weniger Muet). Aber ufzmau si 3 Polizeiwäge cho z fahre mitem Uftrag vomne Telefon, wo isch aglüte worde, e Italiänerin gah z rette, wo sech wott z läbe näh. Wo mir dene aus hei chönne erkläre, hei sis locker gno uh oh schnäu wider gange.

Wo sech d Lag wider chli beruhigt het uh aui sech wider hei ufgwermt gha, isches aber oscho fasch wider mitem Nami-Training witer gange. Auso hei mir nachemne churze Iloufe dasmau üsi Arme bim Chogustosse chönne uspowere, wüu d Bei nüme hätte möge. Nach dene paar Stöös hei när es paari zum Diskus gwächslet uh es paari zum Speer. Aber mir hei när eigentlech schnäu scho Wätterbedingt müesse ufhöre. Mir si no hurti gah d schueh für e nächscht Tag gah aprobiere uh när zrugg id Jugi unger di warmi Duschi.

Nachemne asträngende uh ufregende Tag hei mir dr Abe schön lah usklinge bimne feine Znacht umne gmüetleche Spiuabe.

Kira Bättig

***

Dienstag, 30. Juli 2013

Hüt am Morge si gloub aui mit ämä komische gfüeu ufgwacht, chly ufgregt was eim Hüt erwartet. Am 8- i hets wie jede Morge z’morge gäh. Aui hei vieu gässe das si für Hüt gsterkt si. Scho gli nach em z’morge isch dr Bös richtig Maloja Stoumur gfahre. Via coop, dass mä no het chönne z’mittag choufe. Genau ä viertustung het mä Zyt gah, nid lenger u nid weniger! Wo de z’ganze grüppli isch komplet xi, isch dr Bös mit direktem Wäg zu üsem Ziu gfahre. Wo mr dert si acho hei mir vom Parkplatz us no äs guets haubstüngli müesse loufe bis zum Seeli. Dr Wäg het oh über Stoumur gfüert, de het mä afe eh chline blick chönne druf wärfe was eim speter erwartet. Dr räst vom wäg isch stozig bis sehr stozig xi. Dr See oder besser gseit tümpu, isch sehr dräckig xi, nume Bachi isch gah bädälä! Äs het gloub rächt vieu Deo brucht für dä gestank ume einigermasse ich grif ds becho. J Nach em feine z’mittag si mir de richtig stoumur ache glofe. Äs si drüh Bärgfüerer dert xi wo üs hei erklährt wie mir am beste chöi ueche chlättere. U scho bau het säch aues schnäu verteilt u mir hei uf verschidnige stufene chöne chlättere! Äs isch scho beidruckent we mä gseht das äs paar überhoupt keh angst hei so 20 meter ir höchi z’hange. Äs hei säch gloub scho äs paar überwunde ueche z’chlättere aber d’schlimmste steit nä no bevor. U das isch House running xi… öpis sehr strubs. Da hanget mä chopfs vorah d’stoumur ache u chasech wäg stosse. (lueg d’fotos) J d’schlimmste isch uf jede Fau xi über ds gländer ds chlättere. Am schluss hei das aui hervorragent bewäudigt. Ich bi stouz uf öich ! Nach däm mega ufregente Tag si mir de ume richtig St. Moritz düsset. U mir si oh ganz dankbar ah üsi häufer xi. Ir Jugi acho si mir no chly usse gah sii, chly z’wätter gnosse. Nach feine z’nacht si mr no chly gah spile, äs het gwinner u verlierer gäh ! Schliesslech si mir de aui z’fride is Bett gah pfuse !  

Nadin Falasca

***

Mittwoch, 31. Juli 2013

Üüüühhh hüt isch volles Programm gsi: vo Morgebädele im Stazersee bis Sunneungergang uf Muottas Muragl het dä grandios Sunnetag aues beinhautet. Aber aues dr Reihe nah. Am 7ni heimer üs fürnes witers Footing vor dr Jugi troffe u rächtzytig zude erschte Sunnestrahle heimer üsi Chöpfli im chüele Nass dünklet. Bi dere mystische Morgestimmig hets ume herrlechi Föteli gäh (Renates Foto-Usrüschtig u ihres Foto-Auge hei da o ihre Bitrag drzue gleischtet!). Z‘ Zmorge het so natürlech dopplet gmundet. Nacheme churze Basket und Warm-Up über di chline Hürde hetsech dr Treningstrupp ufteilt uf Hürde u Stab. Di künftige Uefa-Profi-Schirine hei ihri Kadänz mit Liniesprints u Leiterlilöif mächtig gsteigeret.

No vorem Zmittag hetsech am Horizont äs Wüuchli zeigt…Frächheit! Aber viu meh hets nümme gäh…eifach ume äs himmublaus Tägli gsi. Bi däm Wätter heisech di meischte drzue entschlosse am Seeli ihres Mittagsmenü z verzehre. Gli drufabe hetsech Nico mit mir im Gepäck imene schnäue Stächschritt i Richtig Lej da Chöds (Hahneseeli) ufgmacht. So heimer das Seeli zimli schnäu erreicht gha, aber für meh aus äs par Föteli hets nid glängt. Mir si sogar no liecht abetschöggerlet, dases no fürnes churzes Bädli glängt het. Am Nami isch drum Wettkampf (Hoch u Chugu) ufem Programm gstange. Oldie Thömu (Lehmann) hetsech di Glägeheit nid la entgah u zeigt, dass no geng mit ihm z rächne isch. Nächscht Saison äuä äs Seniore-LMM-Team amäude;-) Ämu Bigler isch o geng no topfit.
Znacht hets hüt für di meischte chli früecher gäh, so dassme de jaaa nid z Sunneungergangs-Bähnli uf Muottas verpasst. Dert obe sigs wider ungloublech stimmigsvou u romantisch gsi. Für di Bräschtige wo no id Massage hei müesse (Kira u i) hets nid ono uf Muottas glängt…aber Dampfbad, Souna mit aschliessendem Coup mit Bier ir Sunne isch Entschädigung gnue gsi=)

Michael Bachmeier

***

Donnerstag, 1. August 2013

Happy Birthday Switzerland!

Dä Firtag het scho zimlech gmüetlech agfange. Ohni Footing heimer mauwider einigermasse gnue Schlaf übercho gha u si schön usgrueht am achti ga Zmörgele. Wi immer het de am 9.30 z Trening agfange. Aber hüt simer nid uf der Alag unger gsi, sondern si grad diräkt mit de Velos zum Schanzeseeli ufegfahre u hei dert schomau üsi Sache deopniert. De isches oscho losgange der Hoger ufe richtig Haneseeli. Zum Iloufe simer auso zersch chli ga seckle u hei näre sehr kreative Üebige gmacht, wo auerdings meh ane irische Voukstanz hei erinneret. U de isches ersch richtig los gange!

3x50m steigern; 2x100m (5’P); 4x150m (6’P); 3x80m (8’P).

Mir hei das Programm zwar ufemne sehr idyllische Waudwägli gmacht, aber das het leider o nid dervo abglänkt, dass di Löif birehert si gsi. Immerhin heimer aues gä u versuecht fürt Föteli glich no e gueti Figur z mache. Nume di immer schlimmer wärdende Gsprächstheme hei uf di ufstigendi Süri la schliesse!

Womer aues hei düre gha si di meiste wider az Seeli abegange. Aber näre hets no es paar Spinner gä, wo no Energie hei gha u di letschte paar Stuefe vor Schiispringschanze si ufegstige. Mir hei näre Brätlet u sogar Uele het e schöni Abchüelig gnosse, o wesi teilwis unfreuwiuig isch gsi. Schöne Sturz usem Schluchböötli gsi; Stilnote:10! Wär nid het wöue sünnele u no nid gnue Sport het gmacht gha (Bigler, Blacky, Bachi) hetsech am Namittag no z Bike gschnappet u isch der Trail vom Piz Ner abegflitzt! T Ladies heisech hingäge mit der schöne Ussicht u emne feine Drink zfride gä!

Uf di haubi achti heimer de wider der nächscht gmeinsam Programmpukt gha: z traditionelle Pizza ässe ir Sunne! Hei isch de o üse Presidente Burro derzuegstosse, wo am Mittag mitem Töff isch acho. Früsch duschet und schön gmacht simer de das feine u wouverdiente Dinner ga gniesse. Nachem Coup schlürfe heimer üs der Bös gschappet u si richtig Silvaplana gfahre wüumer dert hei wöue ga z Fürwärch luege, aber knapp vorem Ziu simer plötzlech ine Stou wägemne Fackuumzug cho. Drum simer miz uf der Strass usgstige u hei näre so z 10’ Liechtspektaku glich no chönne gniesse!

Wider zrügg in St. Moritz heisech üsi Wäge de chli trennt. E Teu isch scho zrügg it Jugi gange u angeri si no witer zoge. Zersch zumne oblogate Drink iz Nockzäut u schliesslech no witer iz Stübli. Dert isch zersch zwar no nid so viu los gsi, aber di paar Ängländer wo scho dert si gsi hei unger starchem aukohouifluss scho zimlech Gas gä.

Was dert süsch no aues isch passiert faut nüme i mi Zuestänidkeitsberich... Good Night!

Noemi Zbären

***

Freitag, 2. August 2013

Dä Friti het bi viune im Stübli aagfange. Öpe z`nünte höch simer früeh am Morge heicho. Burro het äue am meiste abbecho, am morge hetme ömu nur no e schlafend brummlende ghört: «I ha no gnue vo gester, bruche nüd z`Morge…»

Meh bhauti iz schüch für mi, mi het`ne ömu ersch am Abe wieder gse.

Nach däm luschtige Erwache (gäu Noemi) simer zum Stazersee hingere. Di erschte Sunnestrahle im chaute Wasser si eifach immer wieder herrlech!

Nachm z`Morge hei Blacky u ig no schnäu gäge Bigler u Sändle es Vier gewinnt gspiut. Dä Sieg füre Finau heimr vrdient gfiiret.

Am haubi zähni heimr mit`m letschte Training gstartet.

Nachm Bäskele heimr Louf-ABC gmacht unär no gnue Frequenzlöif. Z`Motto für die 200m Hürde am Schluss isch gsi: no risk no fun füre letscht run! Es isch bi aune ömu guet usecho.

Z`Wätter isch übrigens o hüt meh aus schön gsi, drum simr nachm Kneippe zum Schanzeseeli u hei dä letscht Nami no richtig gnosse…

Nachm liege u plegere hets när gli mau z`Nacht gä.

Dr Abe isch när mit spiele witergange. Natürlech hei Blacky u ig z`Jenga gwunne, wenigstens mit eim chani hie no plagiere. Gwunne het du när nach aune Finauspiu nid mir sondern Kira und Noemi. Ki het drmit z`zwöite Ticket für ad EM z`Züri gwunne. Nice nice! Dä letscht Abe isch schnäu vrbi gsi, es het gfägt!

Helen Kohler

***

Samstag, 3. August 2013

„Alles hat ein Ende nur die Wurst hat zwei….“ Leider isches wieder sowyt: Hüt steit üsi Heireis ufem Programm. We mir einisch hei aagfange useruume, de geit’s wie z’Bisiwätter. So simer gly einisch nache gsi u es isch aues im Aahänger verstout gsi. Churz nach de Nüne simer de im Bös u Peugeot gäge heizue gröndlet. Ohni Pippi-Stopp isches nid gange, so heimer bire Raschtstätt zuechegha, u hei dert e „Hightech“-Toilette usprobiert. När isch d’Witerfahrt wieder so richtig aagnähm gsi. Next Stopp: Fuchsberg Mc Donalds. Die Sterchig het guet ta u mir hei de dr letscht Bitz no unger d’Räder gno. Churz nach de Zwöie simer de aui wohlbehaute in Langnau aacho.

Gabi Schwarz