Trainingslager St. Moritz
21. Juli bis 3. August 2013

   

Tagebuch/Fotos St. Moritz - Teil 1

Sonntag, 21. Juni 2013
Ankunftstag z St. Moritz

Juhu, mir sy wieder ds St. Moritz! Brünu het üs ohni grösseri Problem is schöne Bündnerland chauffiert. Einzig am Julierpass hei mir amne langsame Holländer-Wohnwage müesse noche schliche.

Gmäss Trainingsprogramm sy mir am haubi sächsi ä Rundi go seklä. Ds Tempo isch scho ziemli höch gsi u einzelni hei scho bau äs Rennä wöuue mache!

Bachi u Blacky sy diräkt vo Rieti agreiset u sy am sächsi ou ds St. Moritz acho. (Dr Reisebricht vo dene zwene wird im Aschluss a miner Zile agfüegt).

Nachem Znacht sy mir no hurti i d’Sunne. Süsch isch nüm viu passiert u drum due i dä Bricht nid künstläch i d Lengi ziehJ!

Renate

 

Anreise Bachi/Blacky:
Ja mir (Bachi u Blacky) si hüt Morge miteme sunnige lächle ufgstange u vo Rieti Richtig St. Moritz ufbroche. Die Goldmedaillefiir isch churz gsi aber umso schöner! De dr Troum vor Nationalhymne ame sone Aalass chönne z’ghöre isch i Erfüllug gange u darum Noemi nomal es grosses MERCI für das mega Kino!!!
6:15 bim Zmorge u 7:00 Abfahrt richtig Rom. Mitem Flüger när gäg Basel zu wo mir unbeschriiblechi Sicht uf üsi schöni Schwitz hei gha. Nachem verabschide vo Zbäres si nume no Bachi u ig im Zug über Zürich-Chur nach St. Moritz gsi. Mir hei du nomal ufe Sieg agstosse u die Fahrt is Engadin gnosse.
Nach guete 12h si o mir ändlech im Trainingslager 2013 glandet.

 

***

 

22. Juni 2013 – Dr erscht Trainingtag

Geng wi geng ischme natürlech am Mändimorge pünktlech am 8:00 bim Zmorge erschine. Üser Gest vom Usland hei auerdings no nid so viu chöne sege am Zmorgetisch, wüu si sech eue z Italie recht hei d Stimmbäng düre gla ( aber das natürlech ou nid für nüt ).  Am haubi zäni hei mir paari üs nere dunger ufem Platz troffe. Zum ihwerme simer chli am See entlang hingere jogget u wider füre, aber das, mit geng chli gas geh u nere wider langsam =) Di zwe Chlinschte hei sech üsere bescheidene Gruppe grad ahghenkt oder besser xseit si hei grad z Tempomache überno. Dert womer nere hei gchert heimer zersch e Haut gmacht  u chli dehnet, am Bruno isch natürlech wider Seich ih Sinn cho woner de Chline zweg cha ahgeh. So Seich wi : wette dir getrouet nech nid… =) womer wider zrug ufem Platz si xsi simer eigentlech nere dr ganz Tag nur no barfis ungerwegs xsi. Zersch chli Loufschueu u nere isches az Herte gange = 10 x  75 m ufem Rase, ja bi dem hei mr aui chli Zunge bei Fuss gha aber mir hei ja nere bis am Vieri frei gha u heinis bim Seeli chöne erhole. Angeri heis aber ou nüme az Seeli gschafft u hei ihres Chöpfli grad im Zimmer ufs Chüssi gleit.

Am Namittag hei mr e intensive Basketbaumatch gha u nach dem no Sprugschueu. Nach au dem hets gheisse mir gö iz no gah Knippe, wi üblech we öper nöi isch im Lager muess de ungerem Brüggli düre schwümme aber irgendwie het dr Nico d Motivation für das eue no nid so gfunge….. chunt ja villicht de no. Bis zum Znacht si nere aui meh oder weniger recht kabutt im Bett glege u heisech nere mit Müeh zum Znacht begäh. Für Bläcky u mi isch speter am abe d Jasspartie recht leid usgange, geg d Leuebergers z gwinne brucht haut ou e gwüssi Rutine, wo üs ebe chli het gfeut ( ah wem dases wük isch glege isch ja glich )  =)

Schlafet guet  u schöns Tägli morn …. Eue mit chli Muskukater

Sévérine Zaugg

 

***

 

Dienstag, 23. Juli 2013

Liebes Tagebuch

Langsam aber sicher simer aklimatisiert u ad höchi gwöhnt. Ds gestrigä Training isch doch no grad chli happig gsi wüu ds eintä oder angere Käterli hetsäch scho bemerkbar gmacht.

Mitemne Iloufä/Chräftigung het ds nöiä Training agfangä. Mit zwöi Houzstäb hetis Uelä zu dä Startblöck usegjagt. D Reaktion isch am Morge früäh extreeeeem guet gsi. Ä Theorieischueb vo Uele het der zwöit Trainingsteu am Morge iglütät. Di Übermittlete Informatione si du grad i Praxis umgsetzt worde!!

Am Mittag simer du fasch aui ads Seeli hingere. Weni fasch schribe meini o fasch. Eini het gfäut. Sevi het du der Nomittag im Bett verbracht u  ihrä Rötu uskuriert. Am Seeli hetsis du no fasch chli wöuä verrägnä u hei du üsi Sache eher zämäpackt aus plaanet. Mitemne churzä Basketball isch du der Nomittag igleitet worde. Es knallherts Hürdetraining hetis du no erwartet. Söfu hert das nid aui ds ganze Programm hei düräghautet u individuell si go Joggä u Kneippä.

Nachem Düschälä u Fenjälä isch du ds Nacht gmampfet worde u aschliessend isch di Aujährlächi Spiurundi iglütet worde. Es geit hür um zwöi Billiet für ad EM in Zürich.  Es churzes Usgangstüürli het du der Tag usglütet.

A jo ……. Ds  Wichtigschtä hani no vergässä !! Bääääääääääääääääärger Simon isch itroffe ids Lager ;)

Bruno Leuenberger

 

***

 

Mittwoch, 24. Juli 2013

Zum Glück isch d Margrit scho mitem Zmorge fertig gsi, wo ihre aui SK-Lüt zum Geburtstag si ga gratuliere. Sie het leider nid soo Glück gha mitem Wätter, es isch zerscht mau di Wuche scho vom Morge a bewöukt gsi. Immerhin u ohni Räge u einigermasse warm.

Drfür isch ds Programm sehr geburtouglich gsi: Am haubi zähni heimer Träffpunkt gha bir Taustation für uf Corviglia. Dert heimer uf dr Finnebahn hinger Löif gha. Bigler u Bärger hei ds Bike mitgnoh u si när vom Piz Nair us aues abe gfahre bis uf Bever. Ihres Ziu isch ds Dessärbuffet mit üs aune wiederum ufem Piz Nair obe gsi (natürlech mitem Bähndli/Gondeli). Usnahmswis ohni gross vorhär ds plagiere, si Bachi, Blacky u Brünu vom Seeli bir Finnebahn us ufe Piz Nair ufe gloffe. U si tatsächlich glichzytig wie mir mitem Bähnli acho. Niemer weiss gnau wie lang u wiit si no hei müesse uferenne.
Nachem Gruppeföteli im Schnee u mit voue Büch simer gäge speter Nami ume abe. Wie letscht Jahr hei es paar no es Apéro im Secondo gno.

Mit Spiu und Spass (Ballonspiu) klingt dr Tag us.

Nadia Jost

 

***

 

Donnerstag, 25. Juli 2013

Hüt am Morge isch z erschte Footing agschtange. Wo äs paari scho  si im Wasser xii isch plötzlech e Jud füdliblut gah bade. Natürlech hei ds aui sehr luschtig gfunge uh Blacky hets ono grad gfiumet. Churz druf si aui Froue im Wasser xih. Nume d Manne hei sich nid iz Wasser trout. Wo d Froue scho fasch wider si dusse xi heis nähr oh afang d Weichschnäbeler dri gschafft. Gli druf abe isch o scho z nächschte Highlight passiert. Es möchtegärn Model isch mit ihrem Kamerateam atrabt uh isch wine Änte dr Stäg füre gwatschlet. Wime Blacky haut so kennt heter sich mit blöde Sprüch nii chönne zrügghaute.

Süsch hei mr am Morge ke Training gha. Einigi hei di Zyt gnützt für nachezschlafe. Angeri si im einigermasse Sunnige Wätter  scho rächt früech az Seeli go Brätle. Irgndeinisch heis du nähr aui dert häre gschafft u äs het chönne gässe wärde. Nach äm Ässe hei sich Sévi, Kira u ih bim Häckispile mit de Manne probiert. Mir heis zwar nii so ganz drufe gha, abr zmingscht öppr het voue Körperiisatz gäh u sogar ihri Gütter iigsetzt. ;)

Am Nami hei mr Witsprung u Chugustosse gha. D Kira het sich scho bim Witsprung dr Fuess chli vrknackst. Woni rä nähr no ä Chugle ha druf la gheie isch nähr gar nüm guet xii. Zum Glück het si no chönne drufstah. Nachem Kneipe isch z Training vo Hüt beändet xih.

Am Abe si mr no churz iz Stübli gange. Abr dr usgang isch du gliich nih so lang gange wi einigi hei erwartet.

Anja Röthlisberger

 

***

 

Freitag, 26 Juli 2013

Hüt bim zmorge ässe si no aui us vor erste Wuche hie xi, aber nümme lang wüu brünu, bärgger und nadja  wärde üs scho gli verla. Aus si sich si cho verabschide isches nümme lang gangee bis mir iz training hei müesse.

Mir hei hüt hürde gmacht. Zersch hürde ABC, när hei mir uf die verschidenste arte müesse drüber secklä. Was es par fählä isch scho ufgfalle wüu mir nur no relativ weni si xi. aber dafür isch ja gester am Abe no Elgi cho. Es par hei o no chli angeri üebige gmacht wöu si ke hürde hei cönne mache.

Wo mir mau mit si fertig xi si mir ga Kugelstossen zersch hei mir gschocket und när es par us stand gschosse. Speter hei mir o no chli mit aluf gworfe und när isch o scho mittag gsi.

Hüt hei mir zum erste mau e churze mittag gha. Di meiste si id sunne ga pizza ässe, nur Egli, Bachi und ig si uf der stabhochsprungmatte xsi und hei dert öbis gässe. Mini dounats si mir verlofe aber es isch glich super xi.

Am nami si mir diräckt ga hochsprung mache. Ig bi zwar nid so guet xi aber es isch glich lustig gsi.

Wo mir si fertig gsi hei mir no speer gmacht das het wi immer sehr spass gmacht. Am schluss si mir wi immer no ga kneippe ou das isch cool xi.

Speter amabe si mir nümme i Usgang aber dafür scho relativ früech iz bett.

Nico Locher

 

***

 

Samstag, 27. Juli 2013

Nach diverse Abgäng am Friti, hei sech schliesslech immer wie weniger Persone zum Zmorgeässe im Rüümli igfunge. Das insbesondere oh, wüu Blacky u Bachi bereits am 6i am Morge mitem Velo Richtig Luzern ufbroche si, um am Namittag d Noemi ar SM azführe. Am haubi 10i isch dr Start vom Morgetraining ufem Programm gstange. Aui Athlete wo no übrig bliebe si, hei sech pünktlech ufdem Platz igfunge. Aschliessend hei mir bäskelet, damit üsi Muskle warm wärde für die 19 bevorstehende Löif. Obwou üs einigi Athlete verletzigsbedingt oder wege cheering si abhande cho, si mir 8 Persone ufem Platz gsi, mit de Zuezüger Sandra und Linda, wo ihres Schiripfiffli mau hei daheime gla. Nach de Löif wo vo 40m bis 100m si gange, isch me de no e Moment usgloffe. Nachem Bsuech im Coop hei mir dr ganz Namittag am wunderbar warme Seeli verbracht und heis üs dertlah guet gah. Dr eint oder anger Sunnebrand het da drbi ebefaus müesse i Chouf gno werde. Womr ne ruf Znacht wieder ir Jugi si zrug gsi, isch oh scho baud dr Startschuss zum Finaulouf vor Noemi gfaue. Aui si gspannt im Rüümli ghöcklet u hei uf z Ergebnis gwartet: E sensationelle Louf mitere verdiente Siegere! Super gmacht Noemi, mir si stouz uf di! J Um die früschbachnegi Schwizermeistere richtig chönne zfiire hei mir bis am morge am 1 im Stübli uf sie gwartet, wome schliesslech ner uf ihri Titlegwinn het chönne astosse. Somit wär auso üses Trainigsgrüppli um es witers Mitglied agstiege!

Myrtha

 

***

 

Sonntag, 28. Juli 2013

Hüt fat z`Tagäbuäch inisch sehr früäch ah, da üsi Luzärntruppä uf di einä am Morgä in St. Moritz igfahrä isch. Einägi si du no is Dorf üsgrückt um ihrä Hungär z`stiuä u di angärä si grad diräkt i Chorb ga ligä. Spetischtens am Morgäässä simer wieder aui komplett gsi. Einägi si nar Sterchig no is chli is Bettli ga nachäschlafä, da z`hüttigä Träning ersch am haubi eufi afat. Bi wunderschönem Wätter simer du när mit üsem Trainer bzw. Tour de Julier Sieger entlang vom St. Moritzer Seeli ga iloufä. Zrugg ufder Bahn, himer üses straffä Programm gmeinsam mit Hürdäüäbigä gstartät. Danach hi di eintä no witer Hürdä praktiziärt u di angäri chlini Truppä, mitem autä Haas, Tom Lehmann, isch no chli at Ruätä ghangät. Im Aschluss himeris bi a paar lokärä 150m bzw. 120m sprints no richtig igwermt fürs witärä training. Vorder churzä Mittagspouse himer noch liächt am Speer gschrissä, mitem Thema „immer Drei“: Drei usem Stang, drei mit drei Schritt, drei mit fünf Schritt, drei mit sibä Schritt u no drei mit vouäm alouf.

Nach Speis und Trank himer zum Ufwermä as Basketbauründäli gä, wo Team rot liächt isch ungergangä. Aus nächschts isch a chlini Seschen Witsprung agsit gsi und zum Abschluss vom Tag no a paar Sprüng a la „Zacharias“ im Hochsprung. Next Termin 15:20 Uhr vorder Jugi, Abfahrt nach Pontresina in die Badi. Wo du ono d`Helen u d`Nadin si derzuägstossä. Herrläch sgi chli is Wasser ga entspannä, schwadärä u „abchüälä“ obwou das z`Wasser warm isch gsi;)

Pünktläch zum Nachtässä simer o wider ir Ungerkunft gsi u im Aschluss himer mitämä Spiuabä der Tag la usklingä.

Marc Egli