Trainingslager St. Moritz
10.07.2024
Fotogallery vom Mittwoch, 10. Juli 2024
Vom 8. bis 20. Juli 2024 absolviert der Sportklub Langnau einmal mehr ein Höhentrainingslager in St. Moritz. Die ersten Tage wurde bei optimalen Bedingungen bereits gut trainiert.
Tagebuch vom Zischtig, 9. Juli 2024
von Jelena und Fabienne
Hüt hei mir mitemne feine Zmorge gestartet. Nach em Zmorge si di einte ufs mäteli gange u aui si sech is zimmer ga ready frs Training mache. Nachdem si mir z erschte mau mit de Velos ufe Platz gange. Mir hei miteme Hürde ABC gstartet u hei nere es paar Sprint u o chli Reaktionsüebige gmacht. Nach dr Pouse isches de ad Langhürde gange. Me het chönne wäle zwüsche 200m und 400m hürde. Denn si mir ga usloufe u ga kneipe. Z Wasser isch riise chaut gsi u es het eim fasch wägspüeut wege dr strömig. Im Coop odr angere Supermerktli ga z Zmittag choufe. Am See odr ir Jugi isch das nere frspise worde. Nachere Pouse hei mir üs am 4i widr vrsammlet u hei sprintserie ufem programm gha. 4x50,5x60,4x80,2x100,4x50 si ufem Programm gstange. Nachdem hei mir no es bitzeli Chugu gschocket u nere nomau ga kneipe. Mit dem Training si mr chli vürspätet fertig wordä u drum si di meistä när direkt zum Znacht. Zum Znacht hei mr äs Gmües- Guery mit Tofu oder Poulet gässe. Nachdem isch no tüchtig gspiut worde zum de abe la usklinge.
Tagebuch vom Mittwuch, 10. Juli 2024
Am 07.40 het der Wecker im Zimmer 226 glütet. D Muriel isch scho lang usem Zimmer gsy wüu si ä strängi Velotour vor sich het gha wo am 8i isch losgange. Mir angere si wie gewohnt am 8i zum Zmorge wo mir aui angere troffe hei. Gstercht u ready fürds ahstehende Training am 09.30 si mir mit de Velos losgfahre. Zersch hets es Ihwerme mit Blacky gä. Är isch wieder mau sehr kreativ worde mit sine Üebige. Mir hei sogar der chlinst vo üsne Finger ihgwermt. Mitemne Hürde-ABC hei mir üs vorbereitet uf ds bevorstehende Hürdetraining. Mir hei es vous Programm gha mit 1er, 3er, 5er u Starts uf die ersti Hürde. Mit lärem Mage u müede Bei si mir no ga Kneipe, bevor mir ids Coop üses Zmittagässe si ga choufe. Üses Zmittag hei mir am See gnosse. Am Nami hei mir frei gha. Ds Programm het bi aune chli angers usgseh. Vo Tennis spile, über Bade am Lej Marsch bis Bike isch aues derbi gsy. Am 18.45 hei mir üs aui dusse vor der Jugi troffe fürnes gmeinsams Foto mit üsne coole St.Moritz-Pullis wo Gabi für üs het gmacht. Nachem Znacht si diversi Partie gspiut worde vo üsem Spiuturnier. Am 9ni isches losgange mitem Schuttmatch England gäge d Niderlande. D Lia, d Sarina, d Muriel u d Emily hei während dem e Nutellapizza ir Sunne gnosse. So isch dä Tag scho wieder verbi gsy u aui si müed u dsfride ga schlafe.
Lia und Emily
Morgenfooting mit Baden im Stazersee
Tagebuch vom Donnschtig, 11. Juli 2024
von Sharmiga u Sara
Fotogallery vom Donnerstag, 11. Juli 2024
Hüt hei mir mitemne Footing am Starzersee i Tag gstartet. Dr See isch zwar no chly früsch gsy, aber es het sehr gued da. Nach dere super Erfrischig, si mir wieder mitem Velo zrügg gfahre u hei wie immer ir Jugi z‘Morgee gesse. Nachem z‘Morgee si säch nächer aui gha parat mache fürs Training.
Hüt isch ufem Programm Speer und Hochsprung gstange. Ufgwärmt hei mir üs mitere Rundi jogge und dr Koordinationsleiter.
Speter het die einti Gruppe Hochsprung u die angeri Gruppe Speer gmacht. Logischerwis hei mir när nach dr Halbzyt no gwechslet. Nachem Training sie die meiste när no gha kneippe. Dr Morgee isch hüt sehr schnäu verbi gange.
Z‘Mittag hei mir aui zämä am Lej Marsh gesse. Zur Abkühelig si es paar gha bade u die angere hei säch ir Sunne chly brünnt. Gstercht si mir när zum zwöite Training gfahre. Ar Inn hei mir Tempolöif - 4x100m & 6x150m gmacht. Zum Abschluss vom Training si aui no id Inn. Am 19.00 Uhr hets ir Jugi z‘Nacht ghä. Mitemne voue Mage hei mir no es paar Spieli gspiut und so isch dr Tag scho wieder verbi gsy.
Tagebuch vom Fritig, 12. Juli 2024
von Elina u Nora
Wo am Morge üse Wecker glüttet het, hets in Ströme grägnet u es isch viu cheuter aus die letschte Täg gsih. När si mir auui ga Zmorge ässe. Dert het dr Blacky gseit, das mir hüt ersch am 10ni anstatt am haubi 10ni Training hei, wägem gruusige Wätter.
Am 10ni si mir wie abgmacht ufem Platz gstange u hei üs mit zwöi lockere Ründeli igwermt. När hei mir Hürde-ABC gmacht u speter si mir im strömende, chaute Räge ono überd Hürde gumpet. Wäge däm schlächte Wätter si mir scho am haubi Zwöufi fertig gsih, u si när üses Zmittag gröschteteuus im Lidl ga ichoufe. Nachdäm das mir üses Zmittag ir Jugi hei gässe, si fasch auui ir Badi „Ovaverva“ gah bädele. Früsch duschet si mir näre ir Jugi a cho. Dr gröst Teu vo üs isch no id Sunne ga e Pizza 🍕 ha, da üs ds Ässe ir Jugi nid so het passt. Nach däm feine Ässe si mir id Jugi zrüg. Ihr Jugi isch äs mit äm Spiuturnier witer gange. Z Fröschlispiu-Finau het statt gfunge, ebe so wie z Dart 🎯 Finau. Mitere feine Pizza im Buch si auui zfride igschlafe.
Tagebuech vom Samschtig, 13. Juli 2024
von Muriel Wegmüller und Sarina Kobel
Fotogallery vom SA 13. Juli 2024
Hüt Morge simer wi normau am 8i ga Zmorge ässä. Es isch o hüt wider fein gsi u het üs guet uf z Training vorbereitet. Hüt het me wider chönne ihcreme wiu z Wätter isch wider besser gmäudet gsi. Ufem Sportplatz hets hüt am Morge Wiitsprung gä. Zu Beginn vom Training hets äs Seiligumpzirkel mit Kraftüebige gä. Im Aschluss simer zur Wiitsprung Alag und hei paar Stigsprüng über d Hürde gmacht. Nach dä Stigsprüng heimer ner d Aloufskontrolle gmacht und ner drü Sprüng i Sang. D Muriel isch ga Velofahre, übere Julier u zrügg übere Albula. Es isch zimlech heiss gsi u dört wome nid ihcremet het het me sech schnäu verbrönnt. Da i dere Wuche e Tennismatch zwüsche der Emily und Janis gägä Sarina und Seya stattgfunde het, und z Verlierteam ä Dürüm schuudet, hets hüt zum Zmittag ä Dürüm gä spändiert vor Emily :)
Nachem Mittag ässä heisech viu usgruuit und sech Zit gä um sech z erholle.
Ufem Namitraining si Tempolöif gstange. Am Afang vom Training hets diversi nöii Üebige mitem Terrabang gä wo üs scho sehr brucht hei. Ufem Programm si ner: 5x150m, 5x100m und 3x120m gstange. Di Löif si nach dere scho intensive Trainingswuche sehr sträng aber o guet gsi.
Nachem Namitraining simer wi immer no ga kneippe. Zum Znacht hets hüt Härdöpfu u Bohne und Bratwurscht gä u zum Dessert Caramelchöpfli. Di letschti Spili vom Spiuturnier si no fertig gspiut worde und somit di letschte Gwinner:inne entstange. Z Turnier isch gwunne worde vor Emily u Elina! Die wo morn hei gö hei no müesse Koffere packe (we sis nid ersch morn morge mache) und ner de ab ins Bett oder zersch no ab in die Sonne am letschte Abe :)
Tagebuech vom Sunntig, 14. Juli 2024
von Hanna Hirsbrunner
Fotogallery vom SO 14. Juli 2024
Nachdem das dr Wecker üs Hüt am 7:30 usem Schlaf grisse het, si mir zum Zmorge gange. Da di meischte vo üs Hüt abreise, hei mir dert abr nid au zu viu Zyt vrgüdet u si nere ga fertig packe u dBett abzieh. Wo de aui wos Zimmer hei müesse abgeh dChertli komplett hei gha u dValerie u dAlisha ou ires Züg is angere Zimmer züglet hei, hei mir üs aui ufe Weg is Training gmacht. DJelena und ig hei ds Iiloufe u dr Callroom für nechscht Wuche düregspiut. Di angere si am See ga Iwerme mit Jogge u Dehne. Nere hei si es Hürde-ABC gmacht u es paar Kordinationslöif. Zum Schluss vo dere Wuche hets no Löif über dHürde geh bevor di meiste vo üs no hurti si i See ga Kneipe. DSarina, dEmely u dSharmiga si nere direkt a Bahnhof gfahre, damit si e früechere Zug hei chönne ne. Dr Rescht het zZmittag im Lidl oder Coop kömerlet, u nere zum Grossteil vor dr Jugi uf dr Terasse vrspiset. Nere ischs ats Tschüss sege gange u e wehmütigi Stimmig het sech vrbreitet. Es si sogar Trene gflosse. Di Wuche hei gloub wük aui meega gnosse. Die wo ou no di zwöiti Wuche bliibe, si sech vor dr Jugendherberge am brüne wi mir vrnoh hei u nere gösi no ane See ga bädele. Vorm Znacht steit de no es Apero mit dr aute Lehrerin vor Yara ah.
Siegerehrung Lager-Olympiade: Emily und Elina (1. Platz), Sharmiga und Bigler (2. Platz)
sowie Valerie und Jelena und Nadja und Sara (beide 3. Platz)
Tagebuech vom Mäntig, 15. Juli 2024
von Nadja Leuenberger
7:30 - Wi jede Morge si mir um di glichi Zit us üsne Bett uus u diräkt zum Zmorge ghocket. Scho fasch chli läär isch üse Grupperuum bim Zmorge gsi, nachdäm geschter viu vo üs si abgreist. Nachem Zmorge si mir üs scho ga parat mache für is erschte Training vo hüt. Vorem Iwerme hets afe mau ä Rundi Häcki gä, leider chli weniger flüssig aus ds druffougende Iwerme mitem Seiligumpi. Nachem Seilsprungzirku isches mit Hochsprung u Speer wittergange. Da mir nume 5 si gsi wo si gumpet, hei mir dä Morge mit viu Sprüng über ds Hochsprungseili verbracht - bim Speer nid angers, viu Speere si a däm Morge übere Platz igfloge.
Nachem Morgetraining si mir tou ga Fleisch iichoufe u hei am Lej Marsh brätlet. Mit vouem Buuch hets när afe mau äs Mittagspöiseli gä. D'Sunne het schön gschune u äs het sogar no äs paar Schwümm im See gä, bevor mir schowider hei müesse zämepacke. Nach dere sunnige u erhousame Mittagspouse si mir pünktlech am Vieri wider ufem Platz gstange. Aus Speziaugast isch hüt sogar no öpper externs is Training cho - der Luca Gurtner. Chli müed u erschlage hets nachem iiwerme Medizinbauüebige gä. När isches oscho los gange mitder stränge Sprintpyramide... D'Gruppestimmig isch währendem Training Hammer gsi u so si die Löif o sehr schnäu düre gange :) Nach däm stränge Training si mir vou Elan zum Kneippe gange. Dert hets afä mau ä Sprung vor Brügg gä, bevor mir zum Znacht gradlet si. Nachem Znacht isch flissig gspiut worde u so hei mir dä Tag o la usklinge.
Tagebuech vom Zischtig, 16. Juli 2024
von Yara Schneider
Mir si hüt wi immär am haubi 8i ufgstangä u hei us zwäg gmacht für ga z Zmorgä ässä. Nachäm Zmorgä si mir zrugg iz Zimmär u hei üs ready gmacht, das mir am haubi 10i ufäm Platz hei chönnä si. Dert si mir churz iglofä u hei när mitämne
Hürde-ABC gstartet. När isch ä chlini Sprintserie vo 3×5×40m ufäm Plan gstangä. Ig bi när zu Blacky ga stäbälä, wärend di angärä übär d Hürdä gsprintät si. Äs isch scho vo Afang Training immär chli bewöukt gsi, doch dasäs üs de grad verschiffät heimer glich nid dänkt. Drum het üsäs Training chli endär ufghört. Mir si schnäu ga Zmittag choufä u hei das ir Jugi gässä, bevor mir üs ufä Wäg id Badi hei gmacht, wo mir där Nami im Sprudubad hei gnossä. Zum Znacht hets griechisch gä, Ris mit Gyros oder Feta. Dr Abä hei mir när no gmüetläch la usklingä.
Tagebuech vom Mittwuch, 17. Juli 2024
von Valerie Lempen
am haubi achti het im zimmer 221 dr wecker glüte. d yara isch wie immer di ersti gsi wos usem bett het gschafft u d alisha het de am zwänzg vor oh afang mau d ouge ufdah. nachem zmorge, bi paarne es dart duell und bi angerne e rundi ufem mätteli simer de aui i üsi zimmer üs ga parat mache. d sumnecreme druffe, täsche packt u scho isches los richtig sportplatz gange. ufem programm isch es iwerme gstange, witsprung, sprintserie, tempolöif u springschueu. ds programm heimer nid dürezoge wie nach plan. am morge heimer de witsprung gmacht mit viune üebige rund um d landig u stigsprüng. aaschliessend hets no 3x150 u no paar chugle wo gstosse si worde. am namitag heimer de no dr räste gmacht u nach dene 2 asträngende trainings simer wohlverdient no ids flüssli ga kneippe. doch da isch dr tag no lang nid fertig gsi. ab di post aui ga düschele, chli früehner ga znacht ässe - es het kartofflegratin mit poulet oder es vegi plätzli gä. ueli het nume derzue gmeint: viu ds trocke das züg:) am haubi achti simer aui im bös ghocket für zur talstation vom muottas muragl. mit dr bahn isches ufe u dert het üs scho mau e super schöni stimmig empfange - immer wider super schön. wes so schön isch gsi heimer natürlech no es paar föteli gmacht, paar si sehr kreativ worde. doch när sis üs ds viu lüt worde u mir hei dr heiwäg atrete. wider zrugg im bös heimer de no d sunne agstüret aus ziu. dert hets no es feins dessert gä u de simer ou scho aui totmüed zrügg id jugi. eigentlech heimer so schnäu wis geit is bett wöue, aber dr res het üs no ufghaute. nach ere kurze konversation mit ihm heimers de oh zrügg ids 221 gschafft.
Tagebuech vom Donnschtig, 18. Juli 2024
von Yara Schneider
Dr Weckär het scho früeh glütä. Äs isch widär Footing agseit gsi, drum hei mir üs am 7i dussä troffä u si a Stazersee ga badä. Bim Zmorgä hei mir üs gsterkt für üsäs Training. Äs si Hürdä ufäm Plan gsi, u so si mir wi immär am haubi 10i ufäm Platz gsi. Am Mittag si mir när züggig ga Zmittag chofä u heis när ir Jugi gässä. När hei mir üs churz zwäg gmacht, das mir när grad hei chönnä losfahrä. Mir hei am Nami z Training la usfauä, u si statt däm i Seilpark in Pontresina gangä. Dert hei mir üsi Musklä o feiächli brucht j ar schwarzä Route si ussert Seya aui gscheitärät. Mir si aui zimläch müed gsi. Där Räscht bis zum Znacht ir Sunnä hei mir ir Badi z Pontresina la usklingä. Ir Sunnä hei mir du no ä feini Pizza, odär angeri feini Spisä gnossä.
Tagebuech vom Fritig, 19. Juli 2024
von ???
?????
